یادێک لە بەهمەن عێزەتی

مردم کامیاران جلو تانکهای ارتش خوابیدند!

ئەوانەی کە نامەکانی مامۆستا فەرزاد کەمانگەریان خوێندۆتەوە، دەزانن کە لە چەند شوێنێک باسی سەمەد بێهرەنگی، خانعەلی و بەهمەن عێزەتی دەکات! بەڵام ئاخۆ بەهمەن عێزەتی کێ بوو؟

ئەم وێنەیە بەهمەن عێزەتی یە! مامۆستای چەپ و شۆڕشگێڕ، وەرزشڤان، بەئەمەگ و دڵسۆز. ساڵی ١٣٥١ لە بواری مێژوودا لیسانسی وەرگرت و پاشان بوو بە مامۆستای خوێندنگەکانی کامێران. بەهمەن عێزەتی وەک مرۆڤێکی شۆڕشگێڕ، ئەڤینداری پیشەی مامۆستایی و خەبات و وشیارکردنەوەی خەڵکی هەژار و خوێندکاران بوو. هێندە بە ڕێز و حورمەتەوە لەگەڵ خوێندکاران هەڵس و کەوتی دەکرد، کە لە کاتی دەرس وتنەوەدا قەت پشتی تێ نەدەکردن؛ یانی ئەگەر بەناو پۆلدا تا خاڵی کۆتایی دەهات، لەم سەریشەوە هەر پشتاوپشت دەگەڕایەوە، بۆ ئەوە کە پشت لە خوێندکاران نەکات!

بەهمەن عێزەتی بە درێژەی ئەو  چەند ساڵە، یانی لە ساڵی ١٣٥١ تا ١٣٥٨ نەسلێک شاگردی پەروەردە کرد کە زۆربەیان لە سەرەتای شۆڕش دا چەکیان هەڵگرت و بوون بە پیشمەرگە و لەپێناو ئامانجەکانیان گیانیان بەخت کرد.

لە مانگی گەلاوێژی ١٣٥٨ دا کە خومەینی دژ بە گەلی کورد، فەرمانی جیهادی دەرکرد، کاتێ کە ئەرتەشی رژیمی ئیسلامی هێرشی کردە سەر کوردستان، ئەم هەواڵە بوو بە سەردێڕی خەبەری بەشێک لە رۆژنامەکانی تاران: "مردم کامیاران جلو تانکهای ارتش خوابیدند!"

 ئەرێ! هەواڵ راست بوو! هێزێکی زۆری رێژیم بە مەبەستی سەرکوتکردنی خەڵکی شارەکانی سنە و مەریوان لە کرماشانەوە وەرێ کەوتبوو، بەڵام کە گەیشتە کامێران، خەڵکی وشیار و شۆڕشگێڕ پێشیان پێگرت و لە گەرمای قرچەی هاوین دا لەسەر جادەکان خەوتن و وتیان: ئێمە نایەڵین ئەم ئەرتەشە بڕوات و هاوزمانەکانمان لە سنە و مەریوان سەرکوت بکات! مەگەر ئەوە کە بەسەر جنازەی ئێمەدا بڕوات!

 بەوجۆرە خەڵکی کامێران توانیان بۆ ماوەی ١٥ رۆژ پێش بە هێزی ئەرتەشی داگیرکەر بگرن. بێگومان رێبەری سەرەکی وەها بزاڤێکی مەدەنی و جەماوەری مامۆستا بەهمەن عزەتی بوو. ئەوەش لە کاتێکا بوو کە عێزەتی شۆڕشگێڕ بەردەوام پێ یەکی لە مەریوان و، پێ یەکی لە کامێران بوو...

 پاش فەرمانی جیهادی خومەینی لە رۆژی ٢٨ گەلاوێژدا، کاتێ کە هێزەکانی ئەرتەشی داگیرکەر هێرشیان کردە سەر شاری پاوە و خەڵکێکی زۆر کوژران و بریندار بوون، کەس نەبوو بگاتە فریای خەڵکی برینداری لێقەوماو. لەم نێوەدا دۆکتور قاسم رەشوەند، دۆکتۆرێکی چەپ و ئازادیخوازی خەڵکی تاران، دێت و دەیەوێ بچێت بە هانای ئەو خەڵکەوە، مامۆستا بەهمەن عزەتیش وەکوو هاوڕێ لەگەڵی دەکەوێ و دەچێ بۆ شاری پاوە. ئەمەش لە کاتێک دایە کە جوخەی مەرگی رژیمی ئیسلامی بە سەرۆکایەتی خەڵخاڵی گەیشتۆتە کوردستان و خەریکە ئەچێ بەرەو پاوە!

سەرلەبەیانی رۆژی ٣٠ی گەلاوێژ؛ خەبەر تاڵ و ژاناوی بوو: مامۆستا بەهمەن عێزەتی و دۆکتۆر قاسم رەشوەند و دە نەفەری دیکە بە دەستوری حاکمی شەرع خەڵخاڵی لە شاری پاوە ئێعدام کران!

بێگومان تێداچوونی بەهمەن عێزەتی و د. رەشوەند خەسارێکی مەزن بوو بۆ بزاڤی پێشکەوتنخوازانە و شۆڕشگێڕانەی کوردستان، بەڵام بەدرێژەی ئەو ٣٤ ساڵە یاد و ناوی بەهمەن عێزەتی لە دڵی هەموو خەڵکی ناوچەکەدا هەر زیندووە! بەجۆرێک کە مامۆستا فەرزاد کەمانگەر خۆی بە درێژەی رەوت و نەریتێک دەزانی کە بەقووڵی لەژێر کاریگەری دەرسەکانی عیزەتی دا بوو...